Azərbaycan millisinin futbolçusu Toral Bayramovun çıxış etdiyi Türkiyənin “Bursapor” komandasının “İstanbulspor”la I Liqanın V tur oyununda hakim biabırçılığı yaşanıb.

Prosport.Az xəbər verir ki, 57-ci dəqiqədə baş hakim Ayberk Demirbaş gözlənilməz ofsayd qərarı verib.

Həmin vaxt 1:0 hesabı ilə öndə olan “Bursaspor”un meydanında “İstanbulspor”un futbolçuları aut atışından sonra hücuma keçib. Yan xətdən daxil olan topun ardından hakim “İstanbulspor”un futbolçusuna qarşı ofsayd qeydə alıb.

Qərar həm “İstanbulspor”, həm də “Bursaspor” futbolçularının təəccübünə səbəb olub. Hər iki komandanın oyunçuları hakimin yanına gedərək etirazlarını bildiriblər.

Bundan sonra qarşılaşma hakim atışı ilə davam etdirilib. “Bursaspor” futbolçuları isə topu rəqib komandaya qaytarıblar.

Hakimin bu qərarı sosial şəbəkələrdə də geniş müzakirələrə səbəb olub.

Qeyd edək ki, oyun “Bursaspor”un böyük hesablı qələbəsi ilə yekunlaşıb – 4:0. Toral Bayramov 70-ci dəqiqədə meydana daxil olub.