“Trabzonspor”un baş məşqçisi Fatih Tekke Avropa Liqasının pley-off mərhələsinin cavab oyununda “Ferentsvaroş”a 0:4 hesablı məğlubiyyətdən sonra istefa verib.

Prosport.Az xəbər verir ki, ilk görüşdə də 0:1 hesabı ilə uduzan Türkiyə klubu iki oyunun nəticəsinə əsasən Avropa Liqasının Liqa mərhələsinə vəsiqə qazana bilməyib. 

Fatih Tekke qarşılaşmadan sonra keçirdiyi mətbuat konfransında istefa qərarını açıqlayıb. 48 yaşlı mütəxəssis ağır məğlubiyyəti öz üzərinə götürdüyünü bildirib.

Lakin “Trabzonspor” rəhbərliyi onun istefasını qəbul etməyib. Klubdan verilən açıqlamada Tekkenin məğlubiyyətin yaratdığı güclü emosional təsir səbəbindən belə qərar verdiyi bildirilib.

Qeyd olunub ki, Fatih Tekke baş məşqçi vəzifəsində fəaliyyətini davam etdirəcək və komanda növbəti Super Liqa oyununda “Amedspor”a qarşı onun rəhbərliyi altında meydana çıxacaq. 

“Trabzonspor” Avropa Liqasından kənarda qaldıqdan sonra mübarizəni Konfrans Liqasında davam etdirəcək.