“Turan Tovuz”un İdarə Heyəti sədrinin müavini Nəsimi Paşayev qalmaqallı şərhi ilə diqqət çəkib.

Prosport.Az xəbər verir ki, tanınmış jurnalist Etibar Cəbrayıloğlu klubun “Şamaxı” ilə qolsuz heç-heçə etdiyi oyunun hakimliyinə ironiyalı münasibət bildirib.

O, “Turan Tovuz” azarkeşlərinin hesaba alınmayan qolla bağlı etirazını AFFA adından satirik formada tənqid edib.

Paşayev isə həmin paylaşımın şərh bölməsində “İt yiyəsini çox yaxşı tanıyır əslində” yazaraq hakimlər və AFFA-ya eyham vurub.

Qeyd edək ki, “Turan Tovuz” – “Şamaxı” matçı qolsuz heç-heçə ilə yekunlaşıb. 75-ci dəqiqədə meydan sahiblərinin zərbəsindən sonra top qonaqların qapı çatına dəyərək yerə düşüb və xətti keçib. Lakin baş hakim Rauf Cabarov VAR-la məsləhətləşmə nəticəsində qolu qeydə almayıb. Bundan sonra Tovuz klubu topun qapı xəttini keçdiyini göstərən video paylaşıb. AFFA Hakimlər Komitəsinin sədri Rəhim Həsənov isə oyun vaxtı əllərində topun qapı xəttini keçdiyini göstərən görüntülərin olmaması səbəbindən qolu qeydə almadıqlarını bildirib.