UEFA Konfrans Liqasının əsas mərhələsinə ilk vəsiqənin sahibi müəyyənləşib.

Prosport.Az xəbər verir ki, Şotlandiya təmsilçisi “Harts” Avstriyada “Rapid”i penaltilər seriyasında üstələyərək, bu hüquqa yiyələnib.

Azərbaycanlı FIFA referisi Elçin Məsiyevin idarə etdiyi qarşılaşma olduqca dramatik alınıb.

Vyana şəhərindəki “Vestştadion”da keçirilmiş matçın əsas vaxtında tərəflər hərəyə 1 dəfə fərqləniblər. 35-ci dəqiqədə Ercan Kara “Rapid”i hesabda önə keçirib. 74-cü dəqiqədə Şotlandiya klubunun futbolçusu Tomas Bent Maqnusson birbaşa qırmızı vərəqə ilə meydandan qovulub.

Azlıqda qalmasına baxmayaraq, “Harts” Pyer Landri Kaborenin 79-cu dəqiqədə vurduğu qolla bərabərliyi təmin edib.

İlk görüşdə 2:2 hesablı heç-heçə qeydə alındığı üçün əlavə vaxt təyin olunub.

Komandalar iki hissədən ibarət 30 dəqiqəlik bölümdə də hərəyə bir qol vurublar. Kelvin Miller 101-ci dəqiqədə “Harts”ı önə çıxarsa da, Nenad Tsvetkoviç 119-cu dəqiqədə fərqlənərək, görüşü penaltilər seriyasına daşıyıb.

Həlledici bölümdə “Harts” daha dəqiq olub və 4:3 hesablı qələbə ilə əsas mərhələyə yüksəlib. “Rapid” isə mübarizəni dayandırıb.

Qeyd edək ki, referi Elçin Məsiyevin briqadasında Elşad Abdullayev və Pərvin Talıbov yan xətt hakimləri, Fərid Hacıyev dördüncü hakim, Nicat İsmayıllı VAR hakiminin köməkçisi qismində yer alıb. Yalnız VAR hakimi funksiyasını fransalı Villi Delajo yerinə yetirib.