Keçmiş “Sanderlend” futbolçusu Denver Hüm 28 yaşında peşəkar karyerasını başa vurub.

Prosport.Az xəbər verir ki, “Sanderlend” akademiyasının yetirməsi olan müdafiəçi ötən ilin oktyabrında “Flitvud”da məşq zamanı baş verən toqquşma nəticəsində kəllə sınığı və beyinə qanaxma keçirib. Uzunmüddətli müalicə və bərpa prosesindən sonra mütəxəssis həkimlərin tövsiyəsi ilə futbolçu karyerasını davam etdirməmək qərarına gəlib. 

Hüm sosial şəbəkə hesabında yaydığı açıqlamada 28 yaşında belə bir qərar verməli olacağını heç vaxt düşünmədiyini bildirib. O, zədədən sonra futbola qayıtmaq üçün uzun müddət çalışdığını, lakin bunun mümkün olmadığını qeyd edib. 

Qeyd edək ki, Denver Hüm karyerası ərzində “Sanderlend”, “Portsmut”, “Qrimsbi Taun” və “Flitvud”un formasını geyinib və ümumilikdə 188 rəsmi oyunda meydana çıxıb.