"Düşünürəm ki, ilk görüşdə böyük imkanlarımız və yaxşı epizodlarımız oldu. Buna baxmayaraq, “Sabah”ın xüsusilə təhlükəli olduğu anları və güclü tərəflərini də nəzərə alırıq. Biz buna qarşı hazırlaşmışıq və öz oyunumuzu nümayiş etdirməyə çalışacağıq".

Prosport.Az xəbər verir ki, bu sözləri İsrailin “Hapoel” (Beer-Şeva) komandasının baş məşqçisi Ran Kojux UEFA Çempionlar Liqasının pley-off mərhələsində Bakıda “Sabah”a qarşı keçirəcəkləri cavab oyunundan əvvəl təşkil olunan mətbuat konfransında deyib.

Onun sözlərinə görə, “Sabah"ın heyətində əla futbolçular var: “Onlar həm texniki, həm də sürət baxımından keyfiyyətli oyun nümayiş etdirirlər. Bütün bunları nəzərə alaraq, meydanda kifayət qədər diqqətli və ağıllı oynamalıyıq”.

İsrailli mütəxəssis komandasının cavab oyununa ciddi hazırlaşdığını söyləyib: “Kimdən soruşsanız, cavab oyununa hesabda üstünlüklə çıxmağı seçər. Əlbəttə, həmişə müəyyən narahatlıq olur, amma mən oyuna öndə başlamağı üstün tuturam. Rəqibin azarkeşlərin yaradacağı atmosfer və ev sahibi olmaq amili “Sabah” üçün böyük üstünlükdür. Bu, bizim öhdəsindən gəlməli olduğumuz əsas faktorlardan biridir. Stadionun demək olar ki, tam dolacağı gözlənilir. Atmosfer barədə düşünmüşük və meydanda buna uyğunlaşmalıyıq”.

Ran Kojux növbəti həftələrdə heyəti yeni oyunçularla daha da gücləndirməyə çalışacaqlarını vurğulayıb: “Aydındır ki, komanda avrokuboklarda nə qədər irəli gedərsə, transfer etmək istədiyimiz futbolçular üçün bir o qədər yaxşı olar. Biz artıq bəzi oyunçularla danışıqlar aparırıq və Avropada oynamaq amili bizə kömək edə bilər”.

Baş məşqçi ailəsinin oyunu tribunadan izləyəcəyini və bunun onda xüsusi motivasiya yaradacağını bildirib: “Ailəmin burada olmasına çox şadam, onların dəstəyi mənim üçün vacibdir. Ümid edirəm ki, oyundan sonra qələbə sevincimizi birlikdə bölüşəcəyik”.

Qeyd edək ki, avqustun 25-də Tofiq Bəhramov adına Respublika stadionunda keçiriləcək "Sabah" - "Hapoel" matçı saat 20:45-də başlayacaq. Səfərdə baş tutan ilk oyunda İsrail təmsilçisi 2:1 hesablı qələbə qazanıb.