"Neftçi" Azərbaycan Premyer Liqasının II turunda "Araz-Naxçıvan"ı 5:0 hesabı ilə darmadağın edib.
Prosport.Az xəbər verir ki, oyundan sonra keçirilən mətbuat konfransında "ağ-qaralar"ın baş məşqçisi Yuri Vernidub matç haqda fikirlərini bölüşüb.
- "Neftçi" digər komandalara nisbətdə təlim-məşq toplanışına daha tez başladı. Komandanın hazırda daha yaxşı oyun sərgiləməsini bu amilə bağlamaq olarmı?
- Mənə bu suala cavab vermək çətindir. Bəli, təlim-məşq toplanışına daha tez başlamışdıq. Bundan əvvəl "Sumqayıt"la matçda da yaxşı oyun sərgiləmişdik. Bu gün "Araz-Naxçıvan"ın yox, "Neftçi"nin günü idi. Rəqib pis komanda deyil. Yaxşı da oynayırdılar. Sadəcə, belə alındı. İlk hissədə yaxşı pressinq edə bildik.
- 2-ci hissədə 1 qol vurmağınız və qol epizodlarının boşa xərclənməsi sizi narahat etdimi?
- 1-ci hissədə 4:0-dan sonra 2-ci yarıda bunu davam etdirmək çətin olur. Çoxlu epizodlarımız oldu, lakin dəyərləndirə bilmədik. Emil Balayev bizi 3 real qoldan xilas etdi. Onu da təbrik etmək istəyirəm.
- Son illərə baxsaq, "Neftçi"nin mövsümə belə uğurlu start verdiyini görməmişdik...
- Hər bir futbolçuya təşəkkür etmək istəyirəm. "Dinamo" ilə matçdan sonra narahat idim. Lakin futbolçular öz üzərində çox işlədiklərini sübüt etdilər. Hər biri göstərdi ki, adları böyük hərflərlə yazılan futbolçulardır. Bizi qarşıda çətin "Zirə" matçı gözləyir. O matç da maraqlı olacaq. İlk 2 qələbədən sonra göylərdə uçmaq lazım deyil. Növbəti matçlara hazırlaşmaq lazımdır. Çempionat çətindir. Kifayət qədər bərabərsəviyyəli komandalardan təşkil olunan çempionatdır.
- Zirvədə qalmaq çətindir. "Qarabağ" və "Sabah"ın avrokuboklardakı davamlı çıxışının sizə çempionatda daha çox kömək edəcəyini nəzərə alsaq, onlara azarkeşlik edəcəksinizmi?
- Bəli, onlara dəstək olacağam. Azərbaycan klubları olaraq onları dəstəkləmək lazımdır. Qazanılan hər bir xal Azərbaycan futbolu adına bir uğurdur.
- Son 2 oyunda künc zərbəsindən sonra qol vurdunuz...
- Önəmlsi də odur ki, çemoionata baxsaq, çox qol standart vəziyyətlərdən vurulur. Biz də hər matçdan əvvəl buna xüsusi çalışırıq. Rəqib komandanı analiz edərkən də bütün epizodları nəzərə alırıq.
- "Dinamo" (Minsk) məğlubiyyəti sizin yadınızdan çıxmır və bu gün də o məqamı xatırladınız...
- Bu məğlubiyyət mövsümün sonuna kimi yadımdan çıxmayacaq. Bütün məsuliyyət mənimdir. Məhz ona görə də yenə sizdən üzr istəyirəm. Çalışacam ki, bir daha sizi məyus etməyim.