Belarus millisinin baş məşqçisi Viktor Qonçarenko komandanın UEFA Millətlər Liqasındakı ev oyunlarını keçirmək üçün Azərbaycan variantının da nəzərdən keçirildiyini açıqlayıb.

Prosport.Az xəbər verir ki, mütəxəssis championat.com-a müsahibəsində Belarusun rəqiblərini neytral meydanda qəbul edəcəyini bildirib. O, yekun seçimin Macarıstan olduğunu deyib:

“Yaxşı xəbər odur ki, rəqiblərimizi Macarıstanda qəbul edə biləcəyik. Axı tribunlarda azarkeşlər olmadan futbol elə də yaxşı deyil”.

Qonçarenko alternativ ölkələr arasında Azərbaycanın da olduğunu söyləyib: “Nəzəri cəhətdən Azərbaycan, Gürcüstan, Ermənistan və Qazaxıstana müraciət edə bilərdik. Amma Macarıstan variantı əvvəldən prioritet idi. İlk növbədə viza dəstəyi və logistika səbəbindən. Nəzərə almaq lazımdır ki, hazırda bizim üçün Avropaya istənilən səfər asan deyil”.

Baş məşqçi Macarıstan Futbol Federasiyasının rəsmi dəvətinin Şengen vizalarının alınmasını da asanlaşdıracağını qeyd edib. Onun sözlərinə görə, San-Marino, Albaniya və Finlandiyaya Macarıstandan getmək, məsələn, Gürcüstandan səfər etməkdən daha rahatdır.

Belarus Millətlər Liqasının C divizionunun 1-ci qrupunda Albaniya, Finlandiya və San-Marino ilə mübarizə aparacaq.

Xatırladaq ki, Ukraynadakı müharibə səbəbindən UEFA Belarus komandalarına ev oyunlarını doğma meydanda keçirməklə bağlı qadağa qoyub.