"Artıq 3 aydır ki, əməkhaqqımız ödənilmir. Federasiya idman zalının icarə haqqını ödəyə bilmədiyi üçün məşq etdiyimiz zal əlimizdən alınıb. Nəticədə təxminən 5 aydır ki, idmançılar normal məşq prosesindən kənarda qalıb".
Bunu Prosport.Az-a həndbol millimizin oyunçusu Cavid İsmayılov bildirib.
Həndbolçu federasiya prezidenti Saleh Məmmədovun maliyyələşdirməyi kəsməsindən sonra yaranan problemlərdən danışıb. Onun sözlərinə görə, yaranmış vəziyyətlə bağlı dəfələrlə Gənclər və İdman Nazirliyinə müraciət ediblər: "Yığma komandanın baş məşqçisi dəfələrlə cənab nazirin qəbulunda olub. Lakin hər dəfə problemin qısa zamanda həll olunacağı bildirilsə də, verilən vədlər bu günədək öz əksini tapmayıb. Nazirlikdə məsələ ilə məşğul olan səlahiyyətli şəxs Elnur müəllim (İdman şöbəsinin müdiri Elnur Məmmədovu nəzərdə tutur – red.) də hər müraciətimiz zamanı səbirli olmağımızı və problemin həll ediləcəyini bildirsə də, artıq 5 aydır ki, vəziyyət dəyişməyib. Təəssüf hissi ilə qeyd edirik ki, gənclər və idman naziri Fərid Qayıbov tərəfindən də problemin həlli istiqamətində konkret nəticə əldə olunmayıb".
O, federasiyada vitse-prezident Orxan Abbasovun və baş katib Yusif Atakişiyevin təyinatlarından narazılığını dilə gətirib: "Vəzifəsini layiqincə idarə edə bilməyən insanların vaxtında həndbola rəhbər vəzifələrə təyin edilməsi nə dərəcədə düzgün qərar idi? Bu gün yaşanan problemlər göstərir ki, məsuliyyət daşıyan şəxslər bunun cavabını verməlidir. Nazirlikdən bir nümayəndə çıxış edərək oyunçuları və məşqçiləri konfrans zalına toplamalı, baş verən hadisələrlə bağlı ictimaiyyətə və idman camiəsinə rəsmi açıqlama verməlidir. Şəffaflıq və hesabatlılıq həm idmanın, həm də idmançıların nüfuzunun qorunması üçün vacibdir".
Mingəçevirin "Kür" komandasından ayrılmış həndbolçu bu klub kimi digərlərinin də yaşamalı olduğunu bildirib: "Nazirlikdə calishan Elnur müəllimə bir sualım var: bütün diqqətinizi və maliyyəni Mingəçevir şəhərinə yönəltmək nə dərəcədə doğrudur? "Kür" klubuna böyük maliyyə ayrılır, bəs bu qərarlar şəxsi yanaşmalara əsaslanmır ki?
Bəs ölkənin müxtəlif bölgələrində məşğul olan 300-dən çox həndbolçunun taleyi necə olacaq? Onların inkişafı, məşqləri və gələcəyi üçün hansı plan nəzərdə tutulub? Bu sualların ictimaiyyət qarşısında açıq və əsaslandırılmış şəkildə cavablandırılması vacibdir".