Çinin Quyyan şəhərində keçirilən boks üzrə Dünya kubokunda 1/8 final mərhələsinə yekun vurulub.

Prosport.Az xəbər verir ki, reytinq xarakterli yarışda Azərbaycan millisinin daha üç üzvü qələbə qazanaraq 1/4 finala vəsiqə əldə edib.

55 kq çəki dərəcəsində çıxış edən Amin Məmmədzadə ikinci görüşündə Özbəkistan təmsilçisi Samandar Olimovu 4:1 hesabı ilə məğlub edib. Boksçumuz növbəti mərhələdə Hindistan idmançısı Nikil Nikillə üz-üzə gələcək.

70 kq-da mübarizə aparan Nəbi İsgəndərov isə Sinqapur təmsilçisi Velvan Tan üzərində inamlı qələbə qazanıb. Rəqibini 5:0 hesabı ilə üstələyən milli üzvü 1/4 finalda Hindistan boksçusu Deepak Deepakla qarşılaşacaq.

80 kq çəki dərəcəsində çıxış edən Murad Allahverdiyev də mərhələni uğurla adlayıb. O, Almaniya təmsilçisi Vitali Valteri 5:0 hesabı ilə məğlub edərək 1/4 finala yüksəlib. Allahverdiyevin növbəti rəqibi Avstraliyadan olan Marlon Sevehon olacaq.

Qeyd edək ki, iyunun 19-da keçiriləcək 1/4 final mərhələsində Azərbaycan millisinin beş boksçusu mübarizə aparacaq. Yığmamızın bir üzvü isə artıq yarımfinala vəsiqəni təmin edib.