Çinin Quyyan şəhərində boks üzrə Dünya kuboku davam edir.

Prosport.Az xəbər verir ki, reytinq xarakterli yarışın ikinci günündə Azərbaycan millisinin daha üç üzvü qələbə qazanaraq növbəti mərhələyə vəsiqə əldə edib.

55 kq çəki dərəcəsində çıxış edən Amin Məmmədzadə Honkonq təmsilçisi Paak Yinq Honu 5:0 hesabı ilə məğlub edib. Hakimlərin yekdil qərarı ilə qalib gələn boksçumuz 1/8 finalda Özbəkistan idmançısı Samandar Olimovla qarşılaşacaq. Döyüş iyunun 17-də keçiriləcək.

75 kq-da mübarizə aparan Səidcəmşid Cəfərov da yarışa inamlı qələbə ilə başlayıb. O, rəqibi üzərində 5:0 hesablı qələbə qazanaraq 1/4 finala yüksəlib. Cəfərov növbəti mərhələdə iranlı Muhammad Nurani ilə üz-üzə gələcək. Qarşılaşma iyunun 19-da baş tutacaq.

90 kq çəki dərəcəsində çıxış edən dünya çempionu Alfonso Dominqes isə 1/4 finalda Almaniya təmsilçisi Kevin Lebovskini 5:0 hesabı ilə məğlub edib. Bu nəticə ilə yarımfinala yüksələn Dominqes özü üçün ən azı bürünc medalı təmin edib. O, finala gedən yolda İngiltərə idmançısı İsaak Oko ilə qarşılaşacaq.

Qeyd edək ki, Quyyandakı Dünya kubokuna iyunun 21-də yekun vurulacaq.