Yeni mövsümdən Azərbaycan Premyer Liqasında çıxış edəcək “Araz-Naxçıvan” növbəti transferini reallaşdırıb.

Prosport.Az klubun rəsmi saytına istinadən xəbər verir ki, Məhəmməd Kadiri ilə 1 illik müqavilə imzalanıb.

Bir neçə gündür komandanın düşərgəsində olan qanalı dayaq yarımmüdafiəçisi karyerasına “Aşanti Qold” klubunda başlayıb. Daha sonra vətənindən Avstriyanın eyniadlı komandasına transfer olunan 27 yaşlı futbolçu Rusiyanın “Arsenal” komandasında da çıxış edib. Onu daha çox məşhurlaşdıran isə Kiyev “Dinamo”sundakı oyunları olub. O, Ukraynada “Çernomorets”in heyətində də yer alıb. Yarımmüdafiəçi Macarıstanın “Honved” klubunun da formasını geyinib.

Xatırladaq ki, "Araz-Naxçıvan" buna qədər Vanderson Kavalkante Melu, Nunu Miqel Rodriqes, Semir Bukviç, Turan Manafov, Nihat Qurbanlı (hər ikisi "Səbail"dən icarəyə götürülüb), Nicat Süleymanov ("Kəpəz"dən icarəyə götürülüb), Elçin Mustafayev ("Şamaxı"dan icarəyə götürülüb),  Abdulla Rzayev ("Sabah"dan icarəyə götürülüb), Numan Kurdiç, Zamiq Əliyev və Miço Kuzmanoviçi də heyətinə cəlb edib.