UEFA Avropa Konfrans Liqasının II təsnifat mərhələsinin "Qəbələ" – "Omoniya" görüşündə kiprli azarkeşlər argentinalı marksist-inqilabçı, Kuba İnqilab Hərəkatının liderlərindən olmuş Çe Qevaranın portretini asıblar. Kiprli azarkeşlərin bu şəxsin şəklini stadionda əks etdirməsi təəccüblə qarşılanıb.

Prosport.Az bunun səbəbini araşdırıb.

Məsələ burasındadır ki, "Omoniya"nın bu azarkeşləri 1992-ci ilin 25 oktyabrında əsası qoyulmuş "9-cu Qapı/Darvaza" ("Tira 9") adlanan fanat qruplaşmasının üzvləridir. Onlar "Omoniya"nın ultras azarkeşləri hesab olunur.

Siyasi baxışlarına görə solçudurlar. 2009-cu ildə keçirilən sorğunun nəticələrinə görə, "Omoniya" azarkeşlərinin 4-dən 3-ü Kipr kommunist partiyası sayılan İşçi Xalqların Tərəqqi Partiyasına səs verib. Onlar kommunist inanclarına görə, oyunlar zamanı Çe Qevaranın portretini və digər kommunist simvollarını daşıyan bannerləri dalğalandırırlar. İsrailin "Hapoel" (Təl-Əviv) və Belçikanın "Standard" kimi klublarının solçu azarkeşləri ilə əlaqələri var. "9-cu Qapı"nın Kiprin paytaxtı Nikosiya ilə yanaşı, Larnaka, Limassol, Pafos, Afina, Saloniki və Londonda da fanklubları var.

Səbuhi Musa