“Qarabağ”ın UEFA Çempionlar Liqasının pley-off mərhələsindəki rəqibi olan “Nyukasl” klubu İngiltərə Premyer Liqasında növbəti oyununu keçirib.

Prosport.Az xəbər verir ki, “sağsağanlar” XXV tur matçında doğma meydanda “Brentford”u qəbul edib. Gərgin keçən görüş qonaqların 3:2 hesablı qələbəsi ilə başa çatıb.

Meydan sahiblərinin heyətində Sven Botman (24) və Brunu Gimarayaş (79, penaltidən) fərqləniblər. “Brentford”un qollarını isə Vitali Yanelt (37), İqor Tiaqo (45+2, penaltidən) və Danqo Uattara (85) vurublar.

Bu məğlubiyyətlə Eddi Haunun komandası daxili turnirlərdəki (Premyer Liqa və Liqa Kuboku) qələbəsizlik seriyasını 6 oyuna çatdırıb. Hazırda “Nyukasl” ölkə çempionatının turnir cədvəlində 33 xalla 12-ci pillədə qərarlaşıb.

Qeyd edək ki, “Nyukasl” və “Qarabağ” arasında ilk qarşılaşma fevralın 18-də Bakıda, cavab oyunu isə fevralın 24-də İngiltərədə keçiriləcək.