"Bu oyuna canlı baxacağam. Dostlarımla birgə Azərbaycan bayrağı götürüb gedib azarkeşlik edəcəyəm".

Bunu Prosport.Az saytına açıqlamasında Azərbaycan millisinin sabiq futbolçusu Vüqar Əsgərov deyib.

"Sumqayıt", "Araz-Naxçıvan" və "Zirə"nin sabiq futbolçusu Latviyada yaşadığından, "Sabah"ın UEFA Avropa Konfrans Liqasındakı rəqibi RFŞ-ni yaxşı tanıdığını bildirib: "Püşkatma zamanı "Sabah"ın olacağını görəndə bu komandaların qarşılaşacağını gözləyirdim. Maraqlı oyun olmalıdır. Hər 2 komanda güclüdür. Müqayisədə "Sabah" cütün favoritidir".

Vüqar Əsgərov RFŞ-nin Riqadakı stadionunun 740 tamaşaçı tutumuna malik olduğunu və UEFA standardlarına cavab vermədiyi üçün Yurmala şəhərində oynadıqlarını bildirib:

"Oyun Yurmalada təbii örtüklü meydançada keçiriləcək. Süni örtüklü meydançada olsaydı, "Sabah" üçün çətin olardı". 

38 yaşlı sabiq hücumçu RFŞ-nin güclü tərəflərini izah edib. O bildirib ki, 42 yaşlı Viktor Moroz ağıllı məşqçidir və hər an "Sabah"a süpriz edə bilər: "İstəyirəm ki, maraqlı oyun olsun, Azərbaycandakı cavab oyununa intriqa qalsın. RFŞ-də hücum, müdafiənin cinahları güclüdür, standard vəziyyətlərdə təhlükəlidirlər. Baş məşqçiləri Viktor Moroz artıq 4 ildir ki, burada işləyir. O, mən "Dauqavpil"də oynayan vaxt baş məşqçi işləyib. I divizionda onunla çempion olmuşuq. İndi RFŞ-də oynayan Fil Dişi Sahilindən olan hücumçu Sedrik Kuadio ilə birgə orda çox qol vurduq. Kuadio 30, mən 31 dəfə fərqlənmişdim. Çox qol vurmağımda Morozun rolu çoxdur. Daha sonra onunla elitada birgə işləmişəm. Həmin vaxt 2 dəfə ayın ən yaxşı futbolçusu seçilmişəm.

Daha sonra 2019-cu ildə Moroz "Dauqavpil"dən RFŞ-yə keçdi. Əvvəl köməkçi məşqçi oldu, 2020-ci ildən baş məşqçidir. Moroz güclü, ağıllı məşqçidir, taktiki cəhətdən "Sabah"a sürpriz edə bilər. Amma yenə deyirəm ki, "Sabah" bu oyunda favoritdir. Onların legionerləri RFŞ-dəkindən daha güclüdür. Bununla belə, meydanda pul elə də rol oynamır. Kim taktiki cəhətdən güclü oynayacaqsa, o da qalib gələcək".

Qeyd edək ki, RFŞ – "Sabah" oyunu bu gün Bakı vaxtı ilə saat 20:00-da başlayacaq.

Səbuhi Musa