""Biz UEFA rəhbərliyi ilə daim əlaqədəyik. Əlbəttə, matçın yerinin dəyişdirilməməsinə çalışırıq. Yaranmış vəziyyət heç bir halda Latviya klubunun məsuliyyəti deyil".

Prosport.Az xəbər verir ki, bunu Latviya Futbol Federasiyasının (LFF) prezidenti Vadim Laşenko deyib.

"Sabah" Latviyada RFŞ komandasına qarşı keçirəcəyi UEFA Konfrans Liqasının II təsnifat mərhələsinin ilk matçının başqa ölkədə oynanılması üçün UEFA-ya müraciət edib.

LFF prezidenti ölkəsinin mətbuatına verdiyi açıqlamada bildirib ki, Avropa futbol qurumu hazırda bu məsələyə baxır: "Şəxsi fikrim odur ki, RFŞ ev oyununu başqa ölkədə keçirməməlidir. Amma UEFA-nın bunu necə qiymətləndirəcəyini təxmin edə bilmərəm, hazırda top onlardadır. Latviya qanunlarına görə isə Şengen vizası olmayan Rusiya vətəndaşlarının ölkəmizə girişi qadağandır".

Qeyd edək ki, "Sabah"ın baş məşqçisi Murad Musayev və 4 köməkçisi, həmçinin, qapıçı Rüstəm Samiqullin və hücumçu Camal Cəfərovun Rusiya vətəndaşlığı olduğundan, onlar Latviyaya buraxılmaya bilər. Hazırda AFFA da bu məsələnin baş tutması üçün "Sabah"a müəyyən dəstək göstərir. 5 saat əvvəl Riqaya yola düşən komanda ilə birgə uçanlar arasında AFFA-nın baş katibi Sərxan Hacıyev də var.