"Neftçi"nin yeni transferi Mark Tamaş klubun yutub kanalına müsahibə verib.

Prosport.Az xəbər verir ki, macarıstanlı mərkəz müdafiəçisi Bakı klubunu seçməsindən söz açıb:

"Neftçi"nin məni istədiyini eşidəndə bunun mənim üçün maraqlı macəra olacağını düşündüm və dərhal "hə" dedim. İndi isə səbirsizliklə meydana çıxmaq üçün şans qazanmağımı gözləyirəm. Burada nəticələr qazanmaq və bir çox titullara yiyələnmək istəyirəm. "Neftçi"ni seçməyimdə əsas məqamlardan biri də budur".

29 yaşlı futbolçu Rumıniyanın "Şepşi" klubu ilə artıq rəsmi oyunlara çıxdığından "Neftçi"də oynamağa hazır olduğunu bildirib: "Bəli, tam hazıram. Çünki bu mövsüm artıq 2 rəsmi oyun keçirmişəm. Həm Rumıniya Superkubokunda, həm də artıq start götürmüş ölkə çempionatında çıxış etmişəm. Buna görə də oynamağa hazıram. Heç bir fiziki problemim yoxdur. "Neftçi" formasında meydana çıxacağım ilk oyunu səbirsizliklə gözləyirəm".

O, "Kluj"da oynamış braziliyalı mərkəz müdafiəçisi ilə yaxşı tanış olduğunu və bunun "Neftçi"də onlara fayda verə biləcəyini vurğulayıb: "Bəli, Yuri Matiasla bir-birimizi tanıyırıq. Biz daha çox rəqib olaraq üz-üzə gəlmişik. Hətta əksər hallarda küncdən zərbələr zamanı bir-birimizi tutmalı olurduq. Bir-birimizə qarşı çox oyun keçirmişik, indi isə birlikdə çıxış etməliyik. Bir-birimizi çox yaxşı tanıyırıq, buna görə də düşünürəm ki, çox yaxşı tandem təşkil edəcəyik. Fikrimcə, birlikdə daha da yaxşı çıxış etmək üçün zamana ehtiyacımız var. Bununla belə, hesab edirəm ki, buna tam hazırıq".

Mark Tamaş "Neftçi"nin çıxış edəcəyi UEFA Avropa Konfrans Liqasında qruplarda oynamaq istədiyini dilə gətirib: "Məncə, Konfrans Liqası turnirinə 100% hazırıq. Səmimi deyim ki, qrup mərhələsinədək yüksəlməyimizi istəyirəm. Bu mövsüm üçün hədəfim budur və buna tam hazıram".