Transfer çalışmalarını davam etdirən “Neftçi” daha bir futbolçunu heyətinə qatıb.

Prosport.Az xəbər verir ki, macarıstanlı futbolçu Mark Tamaşla 2 illik müqavilə bağlanıb. 29 yaşlı mərkəz müdafiəçisi komandanın heyətində 4 nömrəli formanı geyinəcək.

Mark Tamaş Macarıstanın “Videoton” (2012-2013), “Puşkaş Akademiya” (2013-2015), “Dioşdyör” (2015-2020), Polşanın “Şlyonsk” (2020-2022) və Rumıniyanın “Şepşi” (2022-2023) klublarında çıxış edib. Macarıstan milli komandasının heyətində 2021-ci ildə Andorraya qarşı seçmə oyun keçirib. O, bu il “Şepşi”nin heyətində Rumıniya kubokunun və Superkubokunun qalibi olub.

Qeyd edək ki, “Neftçi” bundan əvvəl milli komandamızın üzvləri – qapıçı Emil Balayev, Xorvatiya əsilli yarımmüdafiəçi Filip Ozobiçi və braziliyalı mərkəz müdafiəçisi Yuri Matiası transfer edib.