Azərbaycanlı futbolçu Vüsal İsgəndərlinin çıxış etdiyi Albaniyanın “Eqnatia” klubu avrokuboklarda mübarizəni erkən dayandırıb.

Prosport.Az xəbər verir ki, futbolçumuz UEFA Avropa Konfrans Liqasının I təsnifat mərhələsində Ermənistan təmsilçisi “Ararat-Armeniya”ya qarşı cavab oyununda iştirak edib.

Albaniyadakı “Elbasan Arena”da təşkil olunan qarşılaşmada meydana start heyətində çıxan 28 yaşlı yarımmüdafiəçi 62 dəqiqə mübarizə aparıb. O, hesab 2:2 olarkən müdafiəçi Alessandro Katsbufi ilə əvəzlənib. Əsas vaxtı bu hesabla yekunlaşan oyunun əlavə edilmiş dəqiqələrində komandalar hərəyə daha 2 dəfə fərqləniblər və qarşılaşma 4:4 hesabı ilə yekunlaşıb.

Qalibi müəyyənləşdirmək üçün penaltilər seriyasına ehtiyac duyulub. Burada isə qonaq komanda daha dəqiq oynayıb. Penaltilər seriyasında 2:4 hesabı ilə uduzan “Eqnatia” avrokuboklarla vidalaşıb.

Qeyd edək ki, komandalar arasında İrəvanda keçirilən ilk oyunda 1:1 hesabı qeydə alınıb.