"Sabah" və "Neftçi"nin avrokuboklardakı rəqibləri bəlli olub.

Prosport.Az xəbər verir ki, buna dünən keçirilən UEFA Avropa Konfrans Liqasının I təsnifat mərhələsinin cavab oyunlarından sonra aydınlıq gəlib.

Latviyanın Riqa Futbol Məktəbi (RFŞ) komandası Yurmala şəhərində Şimali Makedoniyanın "Makedoniya Corçe Petrov" komandasını böyük hesabla məğlub edib – 4:1. Meydan sahiblərindən qolları Fil Dişi Sahilindən olan Sedrik Kuadio (2), serbiyalılar Stefan Paniç və Andrey İliç vurub. İlk oyunda da 1:0 qələbə qazanmış riqalılar mərhələni keçən tərəf olub və "Sabah"a rəqib olub.

Bakıda "Azərsun Arena"da keçirilmiş "Dinamo" (Belarus) – "Jelezniçar" (Bosniya və Herseqovina) matçından sonra isə "Neftçi"nin rəqibi müəyyənləşib. Minsk komandası üstün olsa da, Aleksandr Saçivkonun avtoqolu və Suleyman Krpiçin qolu sayəsində bosniyalılar 2:1 qalib gəlib. İlk görüş 2:2 başa çatdığından, "Jelezniçar" mərhələ adlayıb.

Qeyd edək ki, “Sabah” və “Neftçi” bu turnirin II təsnifat mərhələsində ilk oyunu iyulun 27-də səfərdə, cavab matçını avqustun 3-də evdə keçirəcək. Həmçinin, bu mərhələdən mübarizə aparacaq "Qəbələ" "Omoniya"ya (Kipr) qarşı ilk matçını Azərbaycanda oynayacaq.