"Qarabağ"ın prezidenti Tahir Gözəl UEFA Çempionlar Liqasının I təsnifat mərhələsinin "Linkoln Red İmps" klubu ilə oyundan sonra jurnalistlərə müsahibə verib.

Prosport.Az həmin müsabiqəni təqdim edir.

– Ümumi oyun haqda fikirləriniz...
– Bilirsiniz, oyunumuz orada çox ağır alındı. Hava şəraiti pis idi və stadionun vəziyyəti də ürəkaçan deyildi. Bu gün öz yerimizdə Azərbaycan gözəl futbola doydu. Bəhlulun qolu Avropa keyfiyyətində 1 qol idi. Öz yerli futbolçumuzub bu qolu vurması mənə çox xoş gəldi.

– Bundan sonrakı rəqib Polşanın "Rakuf" komandası olacaq. Bu komanda barədə nə deyə bilərsiniz?
– Biz bu günə qədər Polşa komandaları ilə 3 dəfə oynamışıq və hər 3 oyunda qələbə qazanmışıq. Bilirsiniz ki, artıq Avropada zəif komanda yoxdur. Rəqibimiz güclü 1 rəqibdir. Polşa klubları güclü olur. İnşallah, elə bu keyfiyyətdə, bu əzmdə gedib biz oradan qələbə ilə qayıtmağı düşünürük.

– Qış hazırlıq dönəmində bu komandaya məğlub olmuşdunuz. Revanş kimi yanaşmaq olarmı?
– Bilirsiniz, hər oyun yenidir. Mən bir söz deyəcəyəm. Biz ora qələbə üçün gedirik. Məncə, bu kifayət edər.

– Komandadan yeni transferlər gözlənilirmi?
– Bu gün bu qısa müddətdə hər hansı 1 transfer fikri yoxdur. Kevin Medina gedərsə, onun yerinə oyunçu almağı düşünə bilərik. Hələ ki heç nə bəlli deyil.

– Əsas rəqibiniz "Sabah" heyətini gücləndirməyə davam edir. Onların güclənməsi sizə narahat etmir?
– Bu bizi çox sevindirir. Onların qarşısında da çox daha güclü "Qarabağ" var.

– Bu mövsüm üçün komandanın qarşısına avrokuboklarda hansı hədəf qoyulub?
– İnşallah, 4 mərhələ keçib Çempionlar Liqasında çıxış edəcəyik. Bacardıqca irəli getməyə çalışacağıq.

– "Neftçi"də baş məqşçi dəyişikliyi oldu və transferlərə çox yüksək məbləğdə pullar xərcləyir. "Qarabağ" 1 ulduz futbolçu transfer etməklə "Neftçi"yə cavab verə bilərmi?
– Xeyr, biz ulduz futbolçu yox, komandanın ümumi ab-havasını düşünürük. "Neftçi" də, "Sabah" da özümüzünküdür. Onlara da avrokuboklarda uğurlar arzu edirik.