Türkiyənin Bolu şəhərində təlim-məşq toplanışında olan “Qəbələ” bu gün 3-cü yoxlama oyununa çıxacaq.

Prosport.Az xəbər verir ki, bu, “qırmızı-qaralar”ın qardaş ölkədəki hazırlıq prosesində son sınağı olacaq. Toplanışın 9-cü günündə meydana çıxacaq Elmar Baxşıyevin komandası Şimali Makedoniyanın “Qostivar” klubu ilə qarşılaşacaq.

Görüş Bakı vaxtı ilə saat 19:00-da start götürəcək.

Şimali Makedoniyanın eyniadlı şəhərini təmsil edən “Qostivar”ın əsası 1998-ci ildə qoyulub. 2022-2023-cü illər mövsümündə ikinci dəstədə mübarizə aparan komanda 2-ci yeri tutub. Bu, Qostivar təmsilçisinə birinci liqaya vəsiqə verib.

Xatırladaq ki, Boluda iki yoxlama oyunu keçirən “Qəbələ” Moldova “Sukleya”sı (4:2) və Rusiya “Orenburq”u (1:1) ilə qarşılaşıb.

19 iyul

Yoxlama oyunu

19:00. “Qəbələ” - "Qostivar" (Şimali Makedoniya)