Yeni mövsümün hazırlığını Bakıda həyata keçirən “Araz-Naxçıvan” Nunu Miqel Rodriqeslə anlaşıb.

Prosport.Az xəbər verir ki, bu gün Bakıya gələn portuqaliyalı 28 yaşlı futbolçu tibbi müayinədən keçib və onunla 1 il müddətini əhatə edən müqavilə imzalanıb.

Sağ cinah hücumçusunun son klubu Portuqaliyanın 2-ci liqasında iştirak edən “Sportinq da Kuvilya”dır. Nunu karyerası ərzində “Oliveyra du Hospital”, “Pedras Salqadas”, “Qafanha”, “Lusitano”, “Mafra”, “Aroka”, “Vilafrankensi” klublarının da formasını geyinib.

Müqavilə imzaladıqdan sonra futbolçu arazpfk.com-a açıqlama verib: “Ölkəniz haqda eşitmişdim, internet resurslarından da məlumat toplamışdım. Menecerim, eləcə də burada oynayan futbolçulardan müəyyən bilgi əldə etmişdim. Maraqlı, gözəl ölkəniz var. Bilirəm, “Araz-Naxçıvan” uzun fasilədən sonra yenidən Premyer Liqada oynayacaq. Buna görə narahat deyiləm. Yaxşı nəticə qazanmaq üçün əlimdən gələni edəcəyəm. Bilirəm ki, xüsusilə də legionerlərdən gözləntilər böyükdür. Bura kömək etmək üçün gəlmişəm. Komandamla uğur qazanacağıma inanıram”.