"Zirə" yoxlama oyunu çərçivəsində "Kəpəz"ı 2:1 hesabı ilə məğlub edib.
Prosport.Az xəbər verir ki, matçdan sonra paytaxt təmsilçisinin baş məşqçisi Rəşad Sadıqov jurnalistlərin suallarını cavablandırıb:
– 20 gündür məşqlərə başlamışıq. İlk yoxlama oyunumuz idi. Sevindirici haldır ki, futbolçular oyuna ciddi yanaşdılar. Bu, ilk dəqiqələrdən hiss olunurdu. Söhbət nəticədən getmir, meydandakı nizam-intizamdan gedir. Futbolçular matça məsuliyyətlə yanaşırdılar. Mövsümə yaxşı başlamaq çox önəmli olacaq. Ümumən futbolçuların çıxışından razı qaldım.
– İstədiyiniz komandanı formalaşdırmaq üçün nə qədər vaxt tələb olunur?
– Bu, futboldur. Hər mövsüm dəyişikliklər olur, hansısa oyunçular gedir, hansısa oyunçular gəlir. Bir də görürsən aparıcı oyunçular gedir, istədiyin transferləri edə bilmirsən, seleksiya uğursuz olur. Bir çox səbəblər var. Məsələ vaxt məsələsi deyil. Bir neçə mövqe var ki, ora transfer etmək istəyirik. Axtarışlarımız davam edir.
– Hansı mövqelərə transfer etmək istəyirsiniz?
– Mərkəz yarımmüdafiəçisi, bir mərkəz müdafiəçisi – çünki cəmi 2 mərkəz müdafiəçimiz var, legioner qapıçı planlaşdırırıq, hücumameyilli oyunçu istəyirik. Ən azı 3-4 transfer planlaşdırırıq. Amma nə dərəcədə alınacağını zaman göstərəcək.
– 2-ci hissədə əvəzedici heyətdən oyunçular meydana buraxdınız. Onların komanda ilə təlim-məşq toplanışına getməsi mümkündür?
– Mümkündür. O futbolçuların əksəriyyəti həftə içində bizimlə məşq prosesində iştirak edir. Diqqətdə saxlayırıq. 1-2 nəfərin təlim-məşq toplanışına getməsi gözlənilir.
– Adlar bəllidir?
– Oyunu gözümün qabağında canlandırıb bu gün (dünən – red.) fikirləşəcəyəm. Mövqelərə baxacağıq. 3-4 futbolçumuz zədəlidir. İstəyirik ki, toplanışda heç bir mövqedə sıxıntı olmasın.
– Gələn legionerlərin adaptasiyası necə olacaq?
– Tək biz yox, bir çox komandalar bu problemi yaşayır. Hamı istəyər ki, transferlər ilk gündən komanda ilə bir yerdə olsun. Amma hələ ki, istədiyimiz vaxtda istədiyimiz futbolçuları cəlb edə bilmirik.
– Adrian Mutunun "Neftçi"yə baş məşqçi təyin olunması çempionatımıza nə qədər rəng qatacaq?
– Zaman göstərəcək. "Neftçi" üçün uğurlu olsun. Düşünürəm ki, maraqlı olacaq.
– "Qarabağ"ın "Linkoln Red İmps"i keçəcəyi şübhə doğurmur. Siz necə düşünürsünüz?
– Cavab oyununu gözləyəcəyik. Rəqibin təhlükəli əks-hücumları var. Ona görə diqqətli olmaq lazımdır. Həm də "Qarabağ" ev oyununu doğma meydanda keçirməyəcək. Hamının bu matçı düşünməsi daha məsləhətlidir. İnşallah "Linkoln Red İmps"i keçəndən sonra növbəti mərhələ haqda düşünmək olar. Bütün komandalarımıza uğurlar arzulayıram. Diqqətlə izləyəcəyik, azarkeşlik edəcəyik.
– Türkiyədə keçirəcəyiniz yoxlama oyunları üçün bütün rəqiblər bəllidir?
– Müəyyən rəqiblərlə danışıqlar gedir. Hamısı bəlli deyil.
– Hansılar bəllidir?
– Bizim kimi komandalar üçün təlim-məşq toplanışında oyunları əvvəlcədən planlaşdırmaq çətindir.