Misli Premyer Liqasının IV turunun “Neftçi” – “Sabah” oyunundan (0:0) sonra qonaq komandanın baş məşqçisi Valdas Dambrauskas jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib:

– Hər iki komanda üçün nəticə önəmli idi. “Neftçi” də qalib gəlməmişdi, biz də son oyunda istəmədiyimiz nəticə ilə üzləşmişdik. Daha çox əks-hücumlar oldu. Birinci hissədə çox səhv buraxdıq. Mövsüm ərzində etdiyimiz səhvləri yenə təkrarladıq. İkinci hissədə oyunun ritmi yaxşı idi. Sonradan meydana daxil olanlar yaxşı təsir bağışladılar. İrəlidə bu qədər az fürsət yaradırsansa, çətindir. Rəqibin də qol şansı oldu. Oyunun nəticəsi ədalətli idi.

– Azərbaycan millisini Fernandu Santuş və Ayxan Abbasovun rəhbərliyi altında görmüsünüz. Abbasov gəldikdən sonra Abdula Xaybullayevi də milliyə dəvət etdi. Sizcə, Azərbaycan millisi üçün yerli, yoxsa əcnəbi məşqçi yaxşıdır? 

– Bu sual mənim üçün deyil. Mən “Neftçi” – “Sabah” matçı haqda nə qədər istəsəniz, danışa bilərəm. Amma bu, mənə aid olan məsələ deyil. Azərbaycan xalqının, AFFA-nın seçimi olmalıdır. Rəhbərlik seçməlidir.

– 3 oyundan cəmi 4 xal yığmısınız. Bu cür gözləntiniz var idi, yoxsa fikirləşirdiniz ki, 3 matçdan 9 xal da toplamaq olar?

– Mən hara gəldiyimi dərk edirdim. Burada çempionatın gərgin olduğunu bilirdim, liqanı izləyirdim. Çünki bəzi oyunçularım var idi ki, burada çıxış edirdilər. 4 xal bizim üçün gözləmədiyimiz hal idi. Amma bu, mövsümün başlanğıcında normal ola bilər. Bəhanələr gətirmək istəmirəm. Çox inkişaf etməliyik. Bu gün önəmli oyunçularımızdan Cesse Sekidika, Zinedin Uld Xaled, İqor Noqeyra yox idi. Bu, mövsümboyu da baş verəcək, zədəlilər olacaq. Andrey Souza bu gün debüt etdi, Tellur Mütəllimov uzun müddətdən sonra oynadı. Qığılcımlar olduqca, inanıram ki, gələcəkdə böyüyəcəyik, qələbələr olacaq. Bu matçda da çalışdıq. Bəzi şeylər alınmadı. Onların üzərində işləməliyik. Sabah artıq yeni məşqimizə başlayırıq, qarşıdakı matça hazırlaşırıq.