I Liqa təmsilçilərindən "Mingəçevir" və MOİK və II Liqa klubu olan "Şəki Siti"nin loqosu və adının dəyişdirilməsi gözlənilirdi. Lakin bu baş vermədi.

Prosport.Az məsələ ilə bağlı  PFL-in media və marketinq direktoru Sənan Abdullayevə müraciət edib:

"Bizə mövsüm ərzində adının dəyişdirilməsi ilə bağlı "Haypers Quba"dan müraciət gəlib. Biz də onun adını saytımızda "Quba" etdik və loqosunu dəyişdirdik. Nə "Mingəçevir", nə MOİK, nə də "Karvan-Yevlax"dan müraciət daxil olmayıb. Onu da deyim ki, mövsüm ərzində klubun adının dəyişdirilməsi ilə bağlı heç bir məhdudiyyət yoxdur".

MOİK-in adının "Ordu" olacağı hələ ötən mövsümdən bəlli idi. Klub bütün komanda idman növlərində – voleybol, basketbolda olduğu kimi, futbolda da loqosunu dəyişdi, ancaq ad MOİK olaraq qaldı. Məsələ ilə bağlı MOİK tərəfinin fikrini öyrəndik. "Ordu" İdman Klubunun baş katibi Rəşad Qəmərşahoğlunu (Cavadov) dinləyək: "Bu il sənədləşmədə klubun adını dəyişdirməyə çatdıra bilmədik. Ona görə də MOİK kimi mübarizə aparacağıq. İnşallah, gələn ildən "Ordu" adı ilə çıxış edəcəyik".

"Mingəçevir" isə adını "ASTA Mingəçevir" olaraq dəyişdirdi. Klubun yeni loqosu və adı sosial şəbəkələrdə elan edildi. Lakin klub dünən "Səbail" önünə "Mingəçevir" adı ilə çıxış etdi. Bizdə olan məlumata görə, "Mingəçevir" də Ədliyyə Nazirliyində ad dəyişikliyi ilə bağlı problemlə üzləşib. Hazırda klub rəhbərliyi bu məsələ üzərində iş aparır.

Eyni problemlə "Şəki Siti" də üzləşib. II Liqada iddialı kluba çevrilən Şəki təmsilçisi adını və loqosunu daha milli ad və loqoya dəyişdi. Lakin klub hələ də "Şəki Siti" (Sheki City) olaraq davam edir.