Misli Premyer Liqasının IV turunun “Qarabağ” – “Zirə” oyunundan (1:1) sonra qonaq komandanın baş məşqçisi Rəşad Sadıqov jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib…
– Çox sürətli, dinamik, keyfiyyətli oyunun şahidi olduq. “Qarabağ”la keçirdiyimiz maraqlı matçlardan biri idi. Hər iki komanda çox istəkli idi. Ona görə son saniyələrə qədər emosional oyun izlədik. Qarşılaşmanın gedişatına görə qələbə qazanmaq fürsəti yaranmışdı. Çalışdıq, istədik. Təəssüf ki, qol buraxdıq. Bizim üçün yaxşı nəticədir. “Qarabağ”dan alınan hər xal dəyərlidir. Futbolçularıma təşəkkür edirəm. Növbəti oyuna köklənməliyik.
– Son vaxtlar söz-söhbət gəzir ki, milliyə namizədliyiniz irəli sürülüb…
– 2-3 nəfər var. Hamısına eyni suallar yönləndirilir. Mən özümü ucuzlaşmış hiss edirəm. Bir dəfə demişəm. Mövzuya bir daha qayıtmayacağam. Sizdən də xahiş edirəm, bu barədə sual verməyin.
– “Qarabağ”a yoxlama görüşündə 0:4 uduzmuşduz. Kadi həmin matçda da eyni cür qol vurmuşdu…
– Kadi usta futbolçudur. Standart vəziyyət varsa, təhlükədir. Rəqibin standart vəziyyətləri təhlükəlidir. 2 nəfər qoya bilmədik. Çünki hamı birə-bir oynayırdı. O da yaxşı zərbə endirdi. Ağıllı qol alındı. O dəqiqəyədək oyundan qol vəziyyəti verməmişdik. “Qarabağ” çox dinamik futbol oynayırdı, futbolçular çox güc sərf edirdi.
– Demək olar ki, əsas panalti vuranınız artıq Ruan Renatodur, Qismət Alıyev yox?
– Hələki belə qərar qəbul etmişik. Məndə belə fikir var ki, 3 dəfə vura bilməyəndən sonra ara vermək lazımdır. Qismət penaltiçilərdən biridir. Hər an vura bilər. Sadəcə, Qismətə ara verdim. 5 ildə cəmi 3 penaltini dəqiq yerinə yetirə bilməyib.
– Fernandu Santuş gələndə millinin qarşısına AVRO-2028-ə vəsiqə qazanmaq hədəfi qoyulmuşdu. Millidə potensial görürsünüz?
– 2 media əməkdaşına bu barədə cavab verməmişəm. Sizə cavab versəm, onlar inciyər.
– “Qarabağ” “Sumqayıt”a uduzdu, sizinlə oyunda da xal itirdi. Bunu çempionluq üçün şans kimi dəyərləndirirsiniz?
– Hələ 4-cü turdur. Tək “Qarabağ” yox, “Sabah”, “Neftçi”, “Araz-Naxçıvan”, “Turan Tovuz”u nəzərə alsaq, hər komanda çempion olmaq istəyər. Bu il liqa daha rəqabətlidir. O haqda danışmaq çox tezdir, yersizdir. Hamı çempion olmaq istəyər. “Sumqayıt” bu mövsüm necə oyun göstərir. Rahatlıqla avrokuboklardan kənar qala bilərsən. Bütün fikrimizi avrokuboklara vermişik.
– Bundan sonra transferlər olacaq?
– Çox yaxşı futbolçu qarşımıza çıxsa, transfer etməyə çalışacağıq. Bu periodda bəzi oyunçular transferin son dönəminə qədər gözləyir. Elə variant olsa, istəyərik. Mövsümün əvvəlində cinahlarda Fuad Bayrmov və Rövlan Muradovu fikirləşirdik. Amma hər ikisi ciddi zədə aldı. Təcili sol cinah müdafiəçisi transfer etdik.
– Hər legionerə görə 200 min manat rüsum ödəməlisiniz. Nə qədər futbolçu götürə bilərsiniz?
– Limit 17-dir. Komandalarımız çox yaxşı transferlər etdi. Bizi futbol adamı kimi sevindirir. Amma rəqib olaraq qayğılandırır. Planımızda 12 legioner idi.
– Həmişə süni örtüklü meydançalara qarşısınız. “İmişli” artıq Qubada oynayacaq. Ora təbii örtüklüdür. Bu sizi sevindirir?
– Təbii olaraq bizi çox sevindirir. Komanda sayının artması çempionata böyük maraq qatdı. Gözlədiyimizdən də tez effekt verdi. Bütün oyunlar rəqabətli keçir. I Liqadan gələnlər də yaxşı komanda formalaşdırdı. Yeganə məqam infrastruktur qalıb. Qısa müddətdə o da həllini tapar. Liqamız necə maraqlı başlayıb, elə də davam edər.