“Azərbaycan futbolu ciddi yanaşma tələb edir. Orada işlədiyim dövrdə hiss etdim ki, futbolun inkişafı üçün ciddi addımlar atılır. “Qarabağ” Azərbaycan futbolunun bayraqdarıdır. Komandanın ikinci dəfə Çempionlar Liqasının Liqa mərhələsinə yüksəlməsi bunun göstəricisidir”.

Prosport.Az xəbər verir ki, bunu “Qəbələ” və “Neftçi”nin ukraynalı sabiq baş məşqçisi Roman Qriqorçuk deyib.

Təcrübəli mütəxəssis ölkəsinin mətbuatına açıqlamasında DÇ-2026-nın seçmə mərhələsində Azərbaycan millisi (1:1) ilə keçirilən oyun barədə təəssüratlarını bölüşüb: “Matçdan əvvəl favorit olduğumuz məlum idi. Yüksək səviyyəli oyunçularımız var və onlar aparıcı liqalarda çıxış edirlər. Amma Azərbaycanın da müəyyən gücü var. Azərbaycanlıların meydanda müsbət nəticə üçün bütün ümidlərini əllərindən almağımızı istərdim, amma hər şey belə alınmadı. Nəticə bizim üçün o qədər də yaxşı deyil. Futbolçularımız meydana çıxanda hiss etməlidirlər ki, Azərbaycan kimi komandaya qalib gəlmək, dominant futbol oynamaq lazımdır”.

Qriqorçuk azərbaycanlı futbolçular barədə də müsbət fikirlər səsləndirib: “Azərbaycanda futbola düzgün yanaşan çoxlu oyunçu var. Çox sürətli, ağıllı və texniki cəhətdən hazırlıqlı oyunçular mövcuddur. Amma başa düşməliyik ki, Ukrayna millisinin futbolçularının bacarığı azərbaycanlı oyunçulardan qat-qat yüksəkdir. Azərbaycan böyük istək və əzmkarlıq nümayiş etdirdi. Nəticə müəyyən şəraitin məhsuludur. Qrupda hər növbəti oyunu qazanmağı düşünməliyik. Hücum etməli, dominant oynamalı, rəqibləri əzməliyik. Hələ heç nə itirilməyib”.

Qeyd edək ki, seçmə mərhələnin növbəti turunda oktyabrda Azərbaycan Fransa ilə, Ukrayna isə İslandiya ilə qarşılaşacaq.