Ukrayna millisinin sabiq hücumçusu Viktor Leonenko DÇ-2026-nın seçmə mərhələsində Azərbaycan yığmasına qarşı keçirilən oyunu dəyərləndirib.
Prosport.Az xəbər verir ki, 55 yaşlı mütəxəssis 1:1 hesabını biabırçılıq adlandırıb.
O, nəticəyə baxmayaraq, millimizin həvəskar rəqib olduğunu düşünür: “Artıq həvəskarlarla oyunlarda da qol vəziyyəti yarada bilmirik. Azərbaycan millisinin 1 futbolçusu “Çayka”da (Anatoli Krıvotsyuku nəzərdə tutur – red.), digəri tələbələr yığmasında oynayıb. Amma biz onlara da qalib gələ bilmirik. Futbolçularımızın meydanda gəzərək oynamasına artıq öyrəşmişik. Əgər mən Azərbaycana qalib gələ bilməsəydim, dərhal millidən gedirdim. Çünki bu, biabırçılıqdır. Bizim bütün oyunçularımız içi boş pirojkilərdir. 74% topa nəzarət etdilər, amma epizod yaratmadılar”.
Leonenkonun fikrincə, tribunalarda az azarkeşin olması azərbaycanlı futbolçuların zəifliyindən qaynaqlanır: “Gördünüz, stadionda nə qədər tamaşaçı var idi? Bizim veteranların oyununa daha çox adam gəlir. Çünki orada ulduzlar var! “Çayka”da oynamış futbolçuya kim baxmağa gedər? Düşünürdüm ki, bəxtimiz gətirəcək – ya kimsə topu öz qapısına vuracaq, ya standart vəziyyətdən qol olacaq, ya da rəqib müdafiəçi səhv edəcək. Amma heç biri olmadı. Azərbaycana qalib gələ bilmiriksə, deməli, biz bu qədər “güclüyük”. Onlar qaçır, çalışır, can qoyur, bizimkilər isə piyada gəzir”.
Moskva və Kiyev “Dinamo”larında oynamış keçmiş forvard Azərbaycan futbolu barədə tənqidi fikirlər səsləndirib: “Emin Mahmudova bayram etdirdik, ona rekord qolu vurmaq imkanı verdik. Amma Azərbaycan da sevinməsin. Pulları var, futbolçu yetişdirə bilmirlər. Əcnəbiləri gətirsinlər ki, yerlilər onlardan öyrənsin. Azərbaycanın müdafiə xətti həvəskarlardan da zəifdir. Müdafiəçi topa baxmalı və topla oynamalıdır. Rəqibin müdafiəçisi isə Vanata baxırdı. İlk hissədə arxaya atılan uzun ötürmələrimizin hamısı keçirdi. Sudakov qol vuranda Azərbaycanın bütün futbolçuları Vanatın dalınca qaçmışdı. Onların müdafiəsinin səviyyəsi budur. Belə müdafiəyə qarşı da 3 hücumçu ilə oynamaq lazım idi”.
Qeyd edək ki, ilk 2 turdan sonra D qrupunda Fransanın 6, İslandiyanın 3, Ukrayna və Azərbaycanın isə 1 xalı var.