"Sabah" klubunun Polşa millisinin futbolçusu Timoteuş Puxaçı transfer etməsi təəccüblə qarşılanıb.

Prosport.Az xəbər verir ki, bununla bağlı "Qarabağ"ın sabiq müdafiəçisi Yakub Jezniçak paylaşım edib.

Jezniçak 26 yaşlı müdafiəçinin bu qərarını çox qəribə gediş adlandırıb. O bildirib ki, hazırda Almaniyanın "Holştayn Kil" komandasında çıxış edən Puxaça "Qarabağ" da maraq göstərib. Veteran futbolçunun fikrincə, Polşanın "Katovitse" klubu "Sabah"dan üstündür: "Sabah" ortabab klubdur, "Katovitse" futbol planında 100 faiz yüksəkdədir. Yeganə variant əla mövsümü və "Qarabağ"ın göstərdiyi marağı dəyərləndirmək idi. Çünki çox vaxt yüksək səviyyəli oyunçular Azərbaycanda "Qarabağ"a keçirlər. Böyük sürprizdir".

Polşa millisinin sabiq yarımmüdafiəçisi Tomaş Vlodarçik isə yazıb: "Puxaç "Katovitse"yə qoşulmayacaq. Əvəzində "Lex"in yetirməsi bu mövsüm yerli çempionatda 5-ci yeri tutmuş Azərbaycan klubu "Sabah"a transfer olunacaq".

Qeyd edək ki, "Sabah" klubu hələlik Timoteuş Puxaçın transferini açıqlamayıb. Puxaç Polşa klublarından əlavə, Almaniyada "Union Berlin" və "Kayzerslautern", Türkiyədə "Trabzonspor", Yunanıstanda "Panatinaikos" və İngiltərədə "Plimut Arqayl" komandalarının da formasını geyinib.