"İlk hissədə top rəqibdə olsa da, komandam yaxşı müdafiə oluna bildi. Əks-hücumlara keçməyə çalışırdıq. Amma rəqibi topa çox sahib olduğu üçün çətinlik yaranırdı".

Prosport.Az xəbər verir ki, bu sözləri futbol üzrə Azərbaycan milli komandasının baş məşqçisi Fernandu Santuş DÇ-2026-nın seçmə mərhələsinin ilk turunda səfərdə İslandiyaya 0:5 hesabı ilə məğlub olduqları oyundan sonra keçirilmiş mətbuat konfransında deyib.

Portuqaliyalı mütəxəssis fasilədə futbolçulara müəyyən tapşırıqlar verdiyini, lakin ikinci qolu buraxdıqdan sonra komandanın konsentrasiyanı itirdiyini bildirib: "Çox çalışsaq da, vəziyyəti düzəldə bilmədik".

O, istefa vermək barədə düşünmədiyini vurğulayıb: "Çünki AFFA ilə müqaviləm var. Buna əsasən işimi görürəm. Müqavilə şərtlərinə hörmət edirəm".

F.Santuş oyunun gedişində sistem dəyişikliyi etməyə çalışdığını əlavə edib: "Təəssüf ki, istədiyimiz alınmadı. Bu, tək mənim deyil, hər kəsin məsuliyyətidir. AFFA istəsə, mənimlə bu barədə danışar, məsələni həll edərik".

O, Azərbaycan millisinin aciz oyun göstərmədiyini bildirib: "Dediyim kimi, komanda ilk hissədə yaxşı müdafiə olundu. Sadəcə, ikinci qoldan sonra komanda ruhdan düşdü. Ümid edirəm ki, qarşıdakı matçlarda daha yaxşı çıxış edərik. Məğlubiyyətə görə hamımız məsuliyyət daşıyırıq. AFFA düşünsə ki, Fernandu Santuş işə yaramır, bu barədə mənimlə danışar".