2023/2024 mövsümündə Azərbaycan Premyer Liqasında iştirak edəcək "Araz-Naxçıvan" Peşəkar Futbol Klubunun ümumi yığıncağı keçirilib.

Prosport.Az Naxçıvan təmsilçisinin rəsmi feysbuk səhifəsinə istinadən xəbər verir ki, toplantıda klubun yeni təsisçiləri (AFFA (50%) və Naxçıvan Muxtar Respublikası Həmkarlar İttifaqları Şurası (50%) barədə məlumat verilib.

Eyni zamanda, iclas zamanı klubun yeni prezidenti və Müşahidə Şurasının sədri vəzifələrinə seçkilər keçirilib, İdarə Heyəti və Müşahidə Şurasının tərkibi formalaşdırılıb.

Ramin Axundov “Araz-Naxçıvan Peşəkar Futbol Klubu” İctimai Birliyinin prezidenti, Vüqar Abbasov isə Müşahidə Şurasının sədri seçiliblər.

İdarə Heyətinin tərkibi

Ramin Axundov – Sədr // Prezident

Nurlan Həsənov

Ceyhun Məmmədov

İmran Kələşov

Müşahidə Şurasının tərkibi

Vüqar Abbasov – sədr

Orxan Hüseynov – sədr müavini

Taleh İbrahimov – üzv

Elxan Babayev – üzv

Rövnəq Xəlilov – üzv

Mahir Şıxəliyev – üzv

Qeyd edək ki, Ramin Axundov 1976-cı il oktyabrın 15-də Naxçıvan şəhərində anadan olub. Naxçıvan şəhər 9 nömrəli orta məktəbi bitirdikdən sonra Təfəkkür Universitetinə qəbul olub, "Hüquq" fakültəsində ali təhsil alıb. O, 2008-ci ildən “Araz-Naxçıvan” Futzal Klubunun prezidentidir. Azərbaycan Futzal Federasiyasının prezidenti Zaur Axundovun qardaşıdır.

Xatırladaq ki, bu klubun əvvəlki rəhbəri Naxçıvan Futbol Federasiyasının prezidenti, "Cahan Holdinq"in İdarə Heyətinin sədri/prezidenti Vüqar Abbasov olub. Lakin o, Naxçıvan Muxtar Respublikasının Ali Məclisinin sabiq sədri Vasif Talıbova məxsus şirkəti idarə etdiyindən, buradan uzaqlaşdırılıb.