“Neftçi”nin Rusiyanın Sankt-Peterburq şəhərindəki təlim-məşq toplanışı davam edir. 

Prosport.Az klubun saytına istinadən xəbər verir ki, "ağ-qaralar” toplanışın 13-cü günündə səhər məşqinə çıxıblar. Bu gün Bakı vaxtı ilə saat 12:00-dan etibarən “Smena” stadionunda keçirilən hazırlıq prosesində zədəli Emil Balayev iştirak etməyib. 

Əvəzində, komandanın düşərgəsinə qayıdan digər qapıçı Aqil Məmmədov məşqə qatılıb. 

Məşqdə əsasən fiziki təmrinlər və toplu çalışmalar yerinə yetirilib. Hazırlıq axşam məşqi ilə davam edəcək.

Qeyd edək ki, “PARI Premyer Kuboku”nda “Zenit” və “Srvena Zvezda” ilə qarşılaşmış “Neftçi” sonuncu oyununu “Fenerbahçe”yə qarşı keçirəcək. Görüş iyulun 15-i Bakı vaxtı ilə saat 15:00-da “Smena” stadionunda oynanılacaq. Turnir başa çatandan sonra “Neftçi” Rusiyanın paytaxtına yollanaraq Moskva “Spartak”ı ilə yoldaşlıq oyunu keçirəcək.

Bu matç iyulun 18-i Bakı vaxtı ilə saat 22:00-da “Otkrıtiye Bank Arena”da təşkil olunacaq və “Neftçi TV” vasitəsilə canlı yayımlanacaq. Komanda iyulun 19-da Bakıya qayıdacaq və hazırlığını paytaxtda davam etdirəcək.

Xatırladaq ki, A.Məmmədov "PARI Premyer Kuboku"nda "Zenit"lə matçda huşunu itirmiş, xəstəxanaya aparılmışdı.