Ehtiram Quliyev “Turan Tovuz Peşəkar Futbol Klubu” İctimai Birliyinin İdarə Heyətinin sədri seçilib.

Prosport.Az xəbər verir ki, 11 fevraldan Ehtiram Quliyevin təsisçisi və direktoru olduğu "Huner Group” Tovuz klubunun baş sponsoru olsa da, həmin şəxs artıq klubun İdarə Heyətinin sədri vəzifəsini də daşıyacaq. Klub prezidenti isə "Neftçi"nin futbol veteranı Oqtay Abdullayev qalacaq.

1977-ci ildə Tovuz rayonunda anadan olan Ehtiram Tofiq oğlu Quliyev Bursa Ticarət Peşə Liseyində daha sonra isə Ankara Universitetinin hüquq fakültəsində təhsil alıb. 2000-ci ildən peşəkar iş həyatına başlayıb.

İllər ərzində təsis etdiyi şirkətlərin əhatə dairəsini genişləndirərək, müxtəlif sektorlarda uğurlu işlərə imza atıb. 2017-ci ildən etibarən şirkətlərini bir qrup halına gətirərək “Huner Group”u təsis edib. “Huner Group” uzun illərdir Azərbaycan iqtisadiyyatının müxtəlif sahələrində fəaliyyət göstərərək, etibarlı və nüfuzlu marka dəyəri yaradıb. Özünəməxsus tərzi, fərqli yanaşması və peşəkar komandası ilə bir çox uğurlu layihələr həyata keçirib.

44 günlük Vətən müharibəsinin başladığı ilk gündən ordumuza öz dəstəyini göstərmək üçün bütün imkanlarını səfərbər edib. Xidmətlərinə görə Ehtiram Quliyev Azərbaycan Respublikasının Prezidenti tərəfindən “Hərbi əməkdaşlıq sahəsində xidmətlərə görə” və "Vətən müharibəsi iştirakçısı" medalları ilə təltif olunub. Bundan əlavə, Azərbaycan Respublikasının iqtisadi inkişafına verdiyi töhfəyə və sahibkarlıq sahəsində səmərəli fəaliyyətlərinə görə “Tərəqqi” medalı ilə təltif olunub.

Ailəlidir, 2 övladı var.