“Turan Tovuz”un yeni transferi İbrahima Vadji Azərbaycana qayıtmaq üçün bir neçə ölkədən gələn təklifi rədd edib.

Prosport.Az Fransa mətbuatına istinadən xəbər verir ki, seneqallı hücumçu ötən mövsümün sonunda “Sent-Etyen”lə başa çatan müqaviləsini yeniləməyib. 30 yaşlı futbolçunun tez-tez zədədən əziyyət çəkməsi fransızları onunla yeni saziş bağlamaqdan vaz keçirib.

“Sent-Etyen”də olduğu müddətdə 51 oyunda 13 qol vuran Vadji Norveç, Türkiyə, İsrail, Kipr və Yaxın Şərqdən bir çox təkliflər alıb. Lakin “Turan Tovuz”un təklifi daha cəlbedici olduğu üçün forvard Premyer Liqaya dönməyi üstün tutub. O, Qərb klubunda aya 28 min avro qazanacaq.

Bu qərarda Vadjinin Azərbaycana və çempionatımıza bələd olması da rol oynayıb. “Turan Tovuz” üçün problem yaradacaq yeganə məqam sabiq “Qarabağ”lının tez-tez zədə almasıdır.

Qeyd edək ki, İbrahima Vadji “Turan Tovuz”la 1+1 illik müqavilə bağlayıb.