"Qalatasaray" yeni mövsümə hazırlıq məqsədilə Avstriyaya gedib.

Prosport.Az xəbər verir ki, İstanbuldan qalxan özəl təyyarə ilə Qrats hava limanına enən “sarı-qırmızılı” klub oradan da quru yolla Bad Valtersdorf şəhərinə yola düşüb.

“Qalatasaray” karvanını hava limanında qarşılayan “sarı-qırmızılı” azarkeşlər baş məşqçi Okan Buruk və futbolçulara sevgi nümayiş etdiriblər. Azarkeşlərin sıx marağından Okan Buruk və futbolçular komandanın avtobusuna çətinliklə minə bilib.

"Qalatasaray"a məxsus olan, lakin ötən mövsüm icarə əsasında başqa komandalarda çıxış edən futbolçular Aleksandru Çikaldau, Taylan Antalyalı, Oğulcan Çağlayan, Kristian Luyindama və Alpaslan Öztürk “sarı-qırmızılı”ların Avstriyaya yola düşən heyətinə daxil edilməyib.

"Qalatasaray"ın Avstriyadakı ilk təlim-məşq toplanışında 3 yoxlama oyunu keçirməsi nəzərdə tutulub. “Sarı-qırmızılılar" sabah Macarıstanın "Kişvarda", iyulun 14-də Vyana "Austriya"sı və iyulun 18-də digər Avstriya klubu "Şturm”la (Qrats) üz-üzə gələcək.