Ukrayna mətbuatı azərbaycanlı futbolçu Zamiq Əliyevin "Veres" klubuna keçidinin baş tutmamasının səbəbi barədə yazıb.

Prosport.Az xəbər verir ki, Albaniyanın "Eqnatiya" klubunda çıxış edən müdafiəçinin transferi ilə bağlı tərəflər fəal danışıqlar aparsa və razılığa gəlməyə yaxın olsalar da, son anda albanlar sövdələşmədən imtina etmək qərarına gəliblər.

Buna səbəb "Eqnatiya"nın paralel olaraq Zamiq Əliyevin potensial əvəzləyicisi ilə apardıqları danışıqların uğurlu nəticələnməməsidir. Braziliyalı mərkəz müdafiəçisi ilə razılığa gəlinmədiyindən, klub azərbaycanlı futbolçunu heyətdə saxlamağa qərar verib ki, Konfrans Liqasının təsnifat oyunlarında mərkəz müdafiəçisiz qalmasın.

Lakin Prosport.Az-a futbolçunun meneceri Əmrah Akçayın verdiyi məlumata görə, səbəb bu deyil. Rovno klubu "Eqnatiya"nın istədiyi transfer məbləğini vermədiyi üçün transfer baş tutmayıb.