Yunanıstanın “Aris” klubunun baş məşqçisi Marinos Uzunidis UEFA Konfrans Liqasının II təsnifat mərhələsində Bakıda “Araz-Naxçıvan”a 1:2 hesabı ilə uduzduqları ilk oyundan (1:2) sonra jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Bizim üçün pis nəticədir. Qol vurduqdan sonra oyuna nəzarəti itirdik. Daha soyuqqanlı oynamalı idik. Üçüncü qolu da buraxa bilərdik. Bizim üçün qəbuledilməzdir. İkinci hissədə əziyyət çəkəcəyimizi bilirdik. Bu oyunu unudub, növbəti matça hazırlaşmalıyıq.

– “Araz-Naxçıvan” bütün komponentlərdə sizi üstələyərək layiqli qələbə qazandı. Siz də bu fikirdəsiniz?
– Bəli, razıyam.

– Bir həftə ərzində nəyisə dəyişmək mümkündür, yoxsa analizdə hansısa səhvlər buraxmısınız deyə artıq gecdir?
– Cavab görüşü tamamilə fərqli olacaq, görəcəksiniz.

– Nəyə ümidlisiniz?
– İkinci oyunda daha yaxşı olacağıq. Bir həftə vaxtımız var. Fiziki cəhətdən bəzi oyunçuların vəziyyəti yaxşı deyildi. Ona görə belə halları gözləyirdik. Təcrübəli oyunçularımız var. Onların yaxşı reaksiya verəcəyini gözləyirəm. Buraxılan qollarda səhvlər etdik.

– Futbolçularınız meydanda kobud davranış göstərirdi. Bu, sizin oyun stilinizdir, yoxsa uduzurdunuz deyə belə davranırdınız? Üstəlik, bu məqam cavab görüşündə futbolçularınıza psixoloji cəhətdən necə təsir edəcək?
– Biz rəsmi oyun oynayırıq. Bu da normal haldır. İkinci oyunda soyuqqanlı olmalıyıq. İşləyəcəyimiz detallar var.

– “Araz-Naxçıvan”ın avrokuboklarda debütant olması sizə çətinlik yaşatdı...
– Məncə, problem komandamızda idi. Rəqibin necə oynayacağını bilirdik. Daha böyük problem bizim komandada idi. Birinci oyunda istədiyimiz nəticəni əldə edə bilmədik. Cavab görüşündə azarkeşlərimizlə birlikdə qələbə qazanaraq, növbəti mərhələyə vəsiqə əldə etmək istəyirik.