“Qarabağ”ın baş məşqçisi Qurban Qurbanov UEFA Çempionlar Liqasının II təsnifat mərhələsində İrlandiyada “Şelburn”a qalib gəldikləri ilk oyundan (3:0) sonra jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb…

– Futbolçularımı təbrik edirəm. Vacib qələbə idi. Bu stadionda oynamaq bizimçün gərginlik yarada bilərdi. Baxmayaraq ki, 3:0 hesablı qələbə qazandıq, onlardan çox üstün olmadıq. Cavab oyununa necə hazırlaşmağımız vacib olacaq. Bu hesabı unutmalı və Bakıdakı matçda daha ciddi olmalıyıq. Azsaylı azarkeşlərimiz var idi, onların hər birinə təşəkkür edirəm.

– Cütün taleyi həll olundu?
– Qətiyyən yox. Bu rəqib məğlub olmağı sevmir. Komanda meydanda nə etdiyini bilir. Ona görə Bakıdakı matçda burdakından daha diqqətli olmalıyıq.

– Rəqibin təzyiqi zamanı oyun üslubunu dəyişməyi düşünürsünüz?
– Xeyr. Səfərdə oynayırıq və belə termin yoxdur ki, rəqib təzyiq edəndə qeyri-adi nəsə edək. Rəqibə uyğun oyunumuzu qururuq. Sadəcə ilk oyunumuzdur. Qarşıdakı matçlarda daha yaxşı olacağıq. Bizə uyğun olmayan sürətlə, üslubda oynayırdılar. Biz meydançada yerləşənə kimi 1-2 ötürmə ilə hücuma çıxa bilirdilər. Müdafiəçilərimiz bərk durdular, rəqibin hücumçularına imkan vermədilər. Bu oyunda həddindən artıq riskə getməli deyildik.

– Daha əvvəl burada “Dandolk”la qarşılaşmışdınız. Keçmişdəki oyundan hansısa dərs çıxarmışdınız?
– Futbol dəyişir. Geriyə baxsaq, gələcəkdə uduza bilərik. Bu gün üçün hazırlaşırıq. Rəqibə uyğun hazırlaşmışdıq. Amma hər iki matçda – həm bu, həm də “Dandolk”la görüşdə gərgin dəqiqələr oldu. Komandalar keyfiyyətlərini artırır. Belə oyunlar bizimçün əlavə təcrübə olur.