“Xayduk”un baş məşqçisi Qonsalo Qarsiya UEFA Konfrans Liqasının II təsnifat mərhələsində “Zirə”yə qarşı keçirdikləri ilk oyundan (1:1) sonra jurnalistlərin suallarını cavablandırıb.

Prosport.Az xəbər verir ki, mütəxəssis media nümayəndələri ilə görüşdə bunları deyib:

– Qarşılaşmanı necə dəyərləndirərdiniz?
– Çətin oyun oldu. Oyuna həyəcanlı başladıq. “Zirə” bizi ilk fürsətdə cəzalandırdı. İkinci hissədə oyuna daha çox nəzarət edirdik. Hesabı bərabərləşdirdik, şanslarımız da var idi. Nəticədən razıyam.

– “Zirə”ni oyundan əvvəl yəqin ki, analiz etmişdiniz. Bu gün gördüyünüz “Zirə” analiz etdiyiniz komanda idi?
– Xeyr. Dünən də demişdim, gözlədiyim yaxşı “Zirə”ni gördüm. Uzun müddətdir eyni baş məşqçi ilə çalışırlar. Çox təhlükəli rəqibdir. Müdafiədən hücuma keçidlərdə yaxşıdır, təzyiq göstərirlər, keyfiyyətli oyunçuları var.

– Ötən mövsüm “Zirə” “Osiyek”i penaltilərlə keçmişdi. “Xayduk”un bu aqibəti yaşamaması üçün nələr edəcəksiniz?
– Qələbə qazanmağa çalışacağıq ki, oyun penaltilərə getməsin. Bizim də özümüzün oyun üslubu var. Bu gün bəzilərini göstərdik. İstəyirik ki, oyuna nəzarət bizdə olsun. Bu, tək “Zirə”yə qarşı deyil, bütün rəqiblərlə oyundadır. Ümid edirik ki, növbəti görüşdə qələbə qazanacağıq.

– “Xayduk” “Zirə”ni keçə bilməsə, bunu faciə hesab edəcəksiniz?
– Xeyr. Bu, futboldur. Davam edəcəyik. Biz yeni gəlmişik. Müəyyən şeyləri dəyişməyə çalışırıq. Ona görə növbəti mərhələyə vəsiqə qazana bilməsək, bunu faciə kimi dəyərləndirməyəcəyik.