"Rəqibi təhlil etmişik, bizi nə gözlədiyini bilirik".

Prosport.Az xəbər verir ki, bunu "Aris"in (Yunanıstan) baş məşqçisi Marinos Uzunidis UEFA Konfrans Liqasının II təsnifat mərhələsində Bakıda "Araz-Naxçıvan"a qarşı keçirəcəkləri oyundan öncə mətbuat konfransında deyib.

Mütəxəssis səfər qarşılaşmasından sərfəli nəticə ilə dönmək istədiklərini bildirib: "Bu, mənim Azərbaycana ilk səfərim deyil. Daha əvvəl "Qəbələ" klubuna rəqib baş məşqçi kimi ölkənizə səfər etmişdim. Bizi çətin qarşılaşma gözləyir. Sabahkı oyun üçün start heyəti bəllidir. Həmin futbolçularla fərdi söhbətlər aparılıb. Meydana çıxacaq bütün oyunçular tam güclərini ortaya qoymalıdırlar".

O, hər il Avropada Azərbaycan klublarından "Qarabağ"ı gördüklərini söyləyib: "Sizin komandalarınızdan "Qarabağ"ı və "Neftçi"ni tanıyıram. "Qarabağ" hər il avrokuboklarda qruplara düşür. Bunun şahidi oluruq. Ümumiyyətlə, futbolunuzun inkişafda olduğunu söyləyə bilərəm".

Qeyd edək ki, “Araz-Naxçıvan” – “Aris” qarşılaşması sabah, saat 20:00-da “Dalğa Arena”da baş tutacaq.