"Zirə" FIFA-ya müraciət edib.

Prosport.Az sportinfo.az-a istinadən xəbər verir ki, Premyer Liqanın gümüş medalçısı Rafael Utziqlə bağlı ali futbol qurumuna məktub ünvanlayıb.

"Qartallar" braziliyalı hücumçunun klub qarşısında götürdüyü öhdəliyi yerinə yetirməməsi barədə təşkilatı məlumatlandırıb.

Bildirilib ki, "sambaçı" mayın sonunda Azərbaycandan ayrılıb. Komanda bir neçə həftədir yeni mövsümün hazırlıqlarına start versə də, o, hələ düşərgəyə qayıtmayıb.

Qəsəbə təmsilçisi cənubi amerikalı legionerlə bağladığı müqavilənin surətini, həmçinin onun qeyri-müəyyən səbəblərdən burada olmamasını sübuta yetirən sənədləri FIFA-ya göndərib.

Utziq maydan bəri "Zirə"nin baş bəlasına dönüb. Mövsümün bitməsinə 1 tur qalmış klub rəsmiləri ilə görüşən braziliyalı 2026-cı ilin yayınadək qüvvədə olan müqaviləsini qarşılıqlı razılıq əsasında pozmaq istədiyini bildirib.

Bunu da Avropa və Asiyadan bir sıra sərfəli təkliflər almasıyla əlaqələndirib. Vəziyyəti düzgün qiymətləndirən funksionerlər Utziqi transferə çıxarıb.

Onu almaq istəyən klublar 200 min dollara yaxın təzminat ödəməlidir. Fəqət, bugünədək bir real müştəri sinəsini qabağa verərək, iddiasını ortaya qoymayıb.