Yeni mövsümə hazırlıqlarını Türkiyədə davam etdirən "Zirə" bu gün növbəti yoxlama matçını keçirib.

Prosport.Az xəbər verir ki, Rəşad Sadıqovun baş məşqçisi olduğu komanda İordaniya çempionu “Əl-Hüseyn” klubu ilə qüvvəsini sınayıb.

Fanatik Tur Meydançalarında baş tutan qarşılaşmada "Zirə" rəqibini məğlub edib – 1:0. Rəqibin heyətində "Kəpəz"in sabiq seneqallı yarımmüdafiəçisi Latir Fall da olub.

Yeganə qolu 45-ci dəqiqədə ötən mövsüm "Şamaxı"da oynamış Mali əsilli yarımmüdafiəçi Brahim Konate vurub.

Komanda daha əvvəl Bakıda “Qarabağ”a qarşı keçirdiyi yoxlama matçında 0:4 hesabı ilə uduzub. Türkiyədə isə “Ankara Keçiörengücü”ndən üstün olub – 2:1.

Qeyd edək ki, "Zirə" UEFA Konfrans Liqasının II təsnifat mərhələsində Xorvatiyanın "Xayduk" komandası ilə üz-üzə gələcək. Komandalar arasında ilk matç iyulun 23-də, saat 19:30-da "Bakcell Arena"da, cavab görüşü isə ayın 31-də, Bakı vaxtı ilə saat 23:00-da “Polyud” stadionunda start götürəcək.