Yeni mövsümün transfer çalışmalarını davam etdirən “Qəbələ” heyətinə daha bir futbolçu qatıb.

Prosport.Az xəbər verir ki, Fil Dişi Sahilindən olan yarımmüdafiəçi (sağ cinah vingeri) Adriel Ba Lua bölgə təmsilçisi ilə rəsmi müqaviləyə imza atıb.

28 yaşlı afrikalı futbolçu indiyədək "ASEK Mimozas" (Fil Dişi Sahili), "Lill"in B komandası və "Kan"da (hər ikisi Fransa), həmçinin "Vayle" (Danimarka), "Karvina", "Viktoriya" (hər ikisi Çexiya) və "Lex" (Polşa) kimi klublarda çıxış edib. O, ümumilikdə 260 oyunda 26 qol vurub və 40 qol ötürməsi edib.

Adriel Ba Lua həmçinin Fil Dişi Sahilinin U-16 və U-20 yığmalarının heyətində də oynayıb. "Qəbələ"nin yeni transferi 2021-ci ilin 27 avqustunda Çexiyanın "Viktoriya" klubundan Polşanın "Lex" klubuna 1 milyon, 20 min avroya satılıb. O, 2021/22 mövsümündə "Lex"lə Polşa çempionu olub.

Qeyd edək ki, “Qəbələ” daha öncə digər afrikalı futbolçuları – Prins Ovusu, Paulo Kimbila və İsaak Amoanı heyətinə qatıb.