“Sabah”da işlədiyim dönəmlərdə komandada əla atmosfer hökm sürürdü. Azərbaycanda ətrafımda həqiqətən də çox yaxşı insanlar var idi və bu amil ölkəni tərk etməyimə imkan vermirdi.

Prosport.Az xəbər verir ki, bu sözləri “Sabah” komandasının keçmiş baş məşqçisi Murad Musayev Rusiya mətbuatına müsahibəsində deyib.

42 yaşlı rusiyalı mütəxəssis Azərbaycanda çalışdığı dövrü dəyərləndirib: “O dövrdə klub daxilində böyük və müsbət dəyişikliklər baş verirdi. Rəhbərlik verdiyi bütün vədləri yerinə yetirirdi. Baza inşa olunur, stadionda yenidənqurma işləri aparılırdı. Ən önəmlisi isə o idi ki, komanda çox gözəl futbol nümayiş etdirirdi. Kollektiv daxilində elə birlik və enerji var idi ki, hər məşqdən zövq alırdıq. “Sabah”la birlikdə çempionatın gümüş medalını qazandıq, avrokuboklara vəsiqə əldə etdik. Müəyyən mərhələni uğurla başa vurduqdan sonra anladım ki, gedə bilərəm. Bir müddət sonra təkliflər gəlməyə başladı. Amma mənim üçün ən önəmlisi, başladığım işi bitirmək idi. Təkliflər nə qədər yaxşı olsa da, həmin mövsümü tamamlamadan gedə bilməzdim". 

Qeyd edək ki, Murad Musayev 2021-2024-cü illərdə “Sabah”ın baş məşqçisi olub.