Avstriyada təlim-məşq toplanışında olan "Qarabağ" növbəti yoxlama oyununu keçirib.
Prosport.Az xəbər verir ki, Qurban Qurbanovun baş məşqçisi olduğu komanda Niderlandın "Tvente" klubu ilə 1 gündə 2-ci dəfə üz-üzə gəlib
Fərqli heyətlərin meydanda olduğu qarşılaşma Ağdam komandasının bu dəfə 1:2 hesablı məğlubiyyəti ilə bitib. Bu matçda da Esnhede təmsilçisi 2:0 önə keçib. 16-cı dəqiqədə (penaltidən) və 30-cu dəqiqədə "Tvente" fərqlənib. Müdafiəçi Abbas Hüseynov isə başla 66-cı dəqiqədə fərqi azaldıb.
"Köhlən atlar" bu gün ilk matçda bu rəqibə qalib gəlmişdi – 3:2.
Xatırladaq ki, Azərbaycan çempionu Avstriyadakı ilk qarşılaşmada Ukraynanın "Metallist" (Xarkov) kollektivinə uduzub – 4:5. "Köhlən atlar" Bakıdakı yoxlama matçında isə "Zirə"ni 4 cavabsız qolla üstələyib.
Qeyd edək ki, "Qarabağ" UEFA Çempionlar Liqasının II təsnifat mərhələsində "Şelburn" (İrlandiya) – "Linfild" (Şimali İrlandiya) cütünün qalibi ilə qarşılaşacaq. Bu raundun ilk görüşü iyulun 22-23-də, cavab qarşılaşması 29-30-da baş tutacaq.
19:00
Avstriyada təlim-məşq toplanışını davam etdirən “Qarabağ” növbəti yoxlama oyununu keçirib.
Prosport.Az xəbər verir ki, Ağdam təmsilçisi Niderlandın “Tvente” klubu ilə qarşılaşıb. Görüş Azərbaycan çempionunun əzmkar qələbəsi ilə başa çatıb - 3:2.
“Qarabağ” rəqibin vurduğu erkən qollarla hesabda geri düşsə də, sonradan 3 dəfə fərqlənərək qalib gəlib. 22 və 32-ci dəqiqədə rəqib 2:0 öndə olsa da, "Qarabağ" əzmkar qələbə qazanıb. Komandamızın heyətində qolları 36-cı və 53-cü dəqiqələrdə Abdullah Zubir (2) və 43-cü dəqiqədə Leandro Andrade vurub.
Qeyd edək ki, bu gün “Qarabağ”la “Tvente” arasında ikinci oyun da keçiriləcək. Qarşılaşma Bakı vaxtı ilə saat 19:15-də start götürəcək.
“Köhlən atlar” Avstriyadakı ilk yoxlama görüşündə Ukraynanın "Metallist 1925" kollektivinə 4:5 hesabı ilə uduzub. Avstriya toplanışı iyulun 16-dək davam edəcək.
10:15
Avstriyada təlim-məşq toplanışında olan "Qarabağ" bu gün daha iki yoxlama oyunu keçirəcək.
Prosport.Az xəbər verir ki, Qurban Qurbanovun baş məşqçisi olduğu komanda Niderland təmsilçisi "Tvente" ilə üz-üzə gələcək.
İlk görüş Bakı vaxtı ilə saat 17:00-da, ikinci isə 19:15-də başlayacaq.
Azərbaycan çempionu Avstriyadakı ilk qarşılaşmada Ukraynanın "Metallist" (Xarkov) kollektivinə uduzub - 4:5. "Köhlən atlar" Bakıdakı yoxlama matçında isə "Zirə"ni 4 cavabsız qolla üstələyib.
Qeyd edək ki, "Qarabağ" UEFA Çempionlar Liqasının II təsnifat mərhələsində "Şelburn" (İrlandiya) – "Linfild" (Şimali İrlandiya) cütünün qalibi ilə qarşılaşacaq. Bu raundun ilk görüşü iyulun 22-23-də, cavab qarşılaşması 29-30-da baş tutacaq.
