Mövsümlərarası fasilədə Hamidu Keyta və Juninyo ilə müqavilə bağlayan “Qarabağ” daha bir transferi reallaşdırıb.

Prosport.Az sport24.az-a istinadən xəbər verir ki, Ağdam klubu belçikalı vinger Ceyson Lokilo ilə anlaşıb.

24 yaşlı futbolçu hücumun sol cinahı və mərkəz yarımmüdafiəçi kimi çıxış təcrübəsinə malik olsa da, ən çox oynadıldığı mövqe hücumun sağ cinahıdır. Konqo U-20-də 1 oyuna çıxmış futbolçunun son klubu Türkiyənin “İstanbulspor” klubu olub. O, orada "Sparta"dan (Niderland) icarə əsasında çıxış edib. "Anderlext" və "Kristal Palas"ın yetirməsi olmuş Lokilo İngiltərə klubunda əsas heyətə düşə bilməyib və "Loryan" (Fransa), “Donkastr Rovers” (İngiltərə) kimi klublara icarəyə göndərilib. Bundan başqa, "Qurnik" (Polşa) kimi klubların şərəfini qoruyub.

Qeyd edək ki, Brüsseldə anadan olan Ceyson Lokilo “Qarabağ”a sərbəst futbolçu kimi qoşulub. Məşhur transfermarkt.com portalı belçikalının transfer dəyərini 700 min avro göstərib.