Azərbaycan millisinin portuqaliyalı baş məşqçisi Fernandu Santuş İngiltərənin "Liverpul" klubunun futbolçusu Dioqu Jotanın ölümünə münasibət bildirib.

Prosport.Az xəbər verir ki, 70 yaşlı mütəxəssis bu barədə "A Bola" nəşrinə açıqlama verib.

O, həmyerlisini əla insan adlandırıb: "Onun üçün çox dua edə bilərəm. Belə vaxtlarda futbolçu haqqında danışmaq çətindir. O, mən baş məşqçi olanda – 22 yaşında yığmada debüt edib. Dünyanın ən yaxşı oyunçusu Kriştianu Ronaldunun kölgəsində qaldı, amma həmişə öz yerini tapdı. Milli komandada oynamağa can atırdı. Zədəyə görə Qətərdəki dünya çempionatına gedə bilməmişdi. Hazırda mənim düşünəcəyim yeganə şey onun ailəsi, həyat yoldaşı və geridə qoyduğu 3 övladıdır".

Qeyd edək ki, Dioqu Jota Portuqaliya millisi ilə 2 dəfə Millətlər Liqasının qalibi olub. O, həmçinin "Liverpul"la İngiltərə çempionluğunu qazanıb. Hücumçu ağciyər əməliyyatı keçirdiyindən, ona təyyarə ilə uçmaq məsləhət görülməyib. Bu səbəbdən də o, İspaniyanın Santander şəhərindən Liverpula bərə ilə yola düşməli imiş. Lakin qardaşı Andre ilə birgə olduğu "Lamborghini Huracan" avtomobilinin ötmə zamanı təkəri partlayıb və yol kənarına çırpılaraq alovlanıb. Hər iki şəxs qəzasında həyatını itirib.