FIFA-nın İntizam Komitəsi Serbiyanın "Partizan" klubunun yeni oyunçuları qeydiyyatdan keçirməsinə qadağa qoyub.

Prosport.Az xəbər verir ki, səbəb Belqraf təmsilçisinin "Qarabağ"dan 2022-ci ildə transfer etdiyi futbolçu Patrik Andradeyə görə 270 min avro borcunu ödəməməsidir.

"Partizan"ın ümumi borcunun 320 min avro olduğu da vurğulanır.

Klub bununla bağlı yaydığı bəyanatda bildirib ki, əslində Andradeyə borc 242 min avro olub. Məhkəmə kabo-verdeli yarımmüdafiəçinin xeyrinə qərar çıxarıb. Futbolçunu təmsil edən şirkətə ödəniş iyunun əvvəllərinədək edilmədiyi üçün üzərinə gecikmə faizləri də gəlib və borc 270 min avroya çatıb.

Andrade iyunun 22-də "Araz-Naxçıvan"la 1+1 illik müqavilə bağlayıb.

Qeyd edək ki, "Sabah" Sloveniya "Tselye"sini Avropa Liqasının I təsnifat mərhələsində üstələyəcəyi təqdirdə, "Partizan" (Serbiya) - AEK (Larnaka, Kipr) cütünün qalibi ilə qarşılaşacaq.