"Kəpəz" belaruslu kapitanı Yeqor Xvalkonun ardından daha 7 futbolçu ilə yolları ayırıb.

Prosport.Az xəbər verir ki, bunlardan 6-sı legioner və 1-i yerli oyunçudur.

Bunlar müqavilələri başa çatan Trent Buhaqiar, Rati Ardazişvili, Kərim LKuşa, portuqaliyalı futbolçular – Dioqu Verdaşka, Rojeriu Santuş və Valdemar Almeyda, eləcə də Tural Rzayevdir.

Yarımmüdafiəçi mövqeyində oynayan bu futbolçulardan gürcüstanlı olan Rati Ardazişvili cari mövsümdə 18 çempionat oyununda meydanda çıxıb. Artıq Sinqapurun "Tampins Rovers" klubu ilə müqavilə bağlamış Avstraliya doğumlu maltalı Trent Buhaqiar 12 matçda forma geyinib. Mərakeş əsilli ispaniyalı Kərim LKuşa isə 33 görüşdə 1 qolla yadda qalıb.

"Pana" ləqəbli Valdemar Almeyda çempionatda "Kəpəz" forması ilə keçirdiyi 29 oyunda 1 dəfə fərqlənib. Müdafiəçi olan Dioqu Verdaşka 27, Rojeriu Santuş isə 31 matçda bu komandanın şərəfini qoruyub.

Gəncə futbol məktəbinin yetirməsi olan yarımmüdafiəçi Tural Rzayev "Kəpəz"də 2015/2016-cı illər mövsümündə debüt edib. O, "sarı-göylər"in heyətində 6 mövsüm keçirib. Bu müddətdə 122 oyuna çıxıb və 1 qol vurub.

Yeni mövsüm üçün transfer çalışmalarını davam etdirən Gəncə klubu 2 legioner futbolçu ilə müqaviləni yeniləyib. Ötən mövsümdən "Kəpəz"də çıxış edən Mahamadu Ba və Paşu Lira ilə 2 illik anlaşma imzalanıb.

Hücumçu mövqeyində oynayan braziliyalı Paşu son çempionatda 27 oyun keçirərək 4 qol vurub, eyni sayda assist edib. Ampluaca yarımmüdafiəçi olan Mahamadu Ba isə 25 matçda meydana çıxıb. Malili oyunçu azarkeşləri 3 qolla sevindirib.